ခေါင်းထဲမှာ ဒီရက်ပိုင်း မေးခွန်းတခုက ထပ်ခါတလဲလဲ တံခါးလာခေါက်နေတယ်။ အန်စီဂျီယူဘီ၊ အန်စီယူဘီ၊ အမျိုးသားညီညွတ်ရေးလွှတ်တော်၊ အမျိုးသားညီညွတ်ရေးအစိုးရ စတဲ့အသံတွေ …
ညီညွတ်ကြပါ၊ ညီညွတ်ဖို့လိုပြီ၊ ညီညွတ်ရေး အရေးကြီးတယ်ဆိုတဲ့ အသံတွေ …
အမေရိကန်သမ္မတအသစ်ကလေးက စီးပွားရေး ပြန်ပြီးနာလံထူလာအောင်လုပ်မယ့် သူ့ရဲ့ အစီအစဉ်ကို ကွန်ဂရက်ကနေအတည်ပြုပေးဖို့ အပြင်းအထန်ကြိုးစားနေတာတွေ၊ လွှတ်တော် အမတ်တွေက ဘဏ်ကြီးတွေရဲ့ အမှုဆောင်အရာရှိကြီးတွေကို ခေါ်ပြီး မေးလိုက် မြန်းလိုက်၊ ကြိမ်းလိုက် မောင်းလိုက်၊ အစိုးရ၀န်ကြီးတွေကိုခေါ်ပြီး ကြိမ်းလိုက် မောင်းလိုက် လုပ်နေတာ တွေ …
ဒီကြားထဲမှာ မသေရုံတမယ် နိုင်ငံရေးအသက်လောက်ပဲ ကျန်တော့တဲ့သူတွေက ခါတော်မီ နိုင်ငံရေး စကားကြီးစကားကျယ်တွေ၊ ကိုယ်တိုင်က မတည်ဆောက်နိုင်ခဲ့တဲ့၊ တည်ဆောက်ဖို့ ဘယ်တုန်းကမှ အပြင်းအထန် အလေးအနက် မကြိုးစားခဲ့ဖူးတဲ့ “ညီညွတ်ရေး” ဆိုတာကို လျှာအရသာခံပြီး “နှိပ်ပလိုက်မယ်” ဆိုတဲ့ အတွင်းစိတ်အခံနဲ့ ရေးကြ၊ ပြောကြ၊ တွတ်ထိုးကြ တာတွေကလည်း တွေ့လာ ကြားလာရပြန်တယ်။
ဒါနဲ့ပဲ အဲဒီမေးခွန်းက အဆက်မပြတ် တံခါး လာလာခေါက်နေတော့တာပါပဲ။
မေးခွန်းက ဒီလိုပါ … “Are we ready to govern?” “ကျနော်တို့တွေ နိုင်ငံအုပ်ချုပ်ဖို့ အဆင်သင့်ဖြစ်ပါပြီလား။”
ဒီမေးခွန်းမှာ We လို့ သုံးလိုက်တဲ့အတွက် ဒီဘလော့ဂ်ပိုင်ရှင်ကိုယ်တိုင် အုပ်ချုပ်မှာလားလို့ တော့ ဒွိဟမပွားလိုက်ပါနဲ့။ ပမာပြု တင်စားထားတဲ့ မေးခွန်းပါ။
နိုင်ငံတခုကိုအုပ်ချုပ်ဖို့ အဆင်သင့်ဖြစ်ကြပါပြီလားခင်ဗျာ။ လူဦးရေ သန်း ၅၀ ပတ်ဝန်းကျင် ရှိတဲ့ နိုင်ငံလေးတခုကိုအုပ်ချုပ်ဖို့ အဆင်သင့်ဖြစ်ကြပါပြီလားခင်ဗျာ။
ကျနော်က နိုင်ငံလေးလို့ပြောလိုက်တော့ စိတ်နာကြမလားမပြောတတ်ဘူး။ တကယ်က မြန်မာ ပြည်ဆိုတာ နိုင်ငံငယ်လေးပါ။ အမေရိကန်ရဲ့ ပြည်နယ် ၅၀ ထဲမှာ လူဦးရေအများဆုံး ကာလီဖိုးနီးယားပြည်နယ်နဲ့ ပဉ္စမ လူဦးရေအများဆုံး အီလီနွိုင်းပြည်နယ် နှစ်ခုပေါင်းလူဦးရေ ပတ်ဝန်းကျင်လောက်ပဲရှိပါတယ်။ ၂၀၀၈ ခုနှစ် စာရင်းတွေအရပါ။
လက်ရှိ စစ်အစိုးရထက် သာမှာပါလိုတော့ မဖြေပါနဲ့။ မြန်မာနိုင်ငံ၊ မြန်မာလူထုဟာ ညံ့ဖျင်း နုံချာလှတဲ့ အခုစစ်အစိုးရဒဏ် ခံရပြီးတဲ့နောက် နောက်ထပ် ညံ့ဖျင်း နုံချာလှတဲ့ ဘယ်လို အစိုးရမျိုးကိုမှ၊ စစ်ပဲဖြစ်ဖြစ်၊ မစစ်ပဲဖြစ်ဖြစ်၊ မတတ်နိုင်တော့ပါဘူး။ လုံလောက်သည်ထက် ပိုလွန်းနေပါပြီ။
ဒီမေးခွန်းကို ဒီပို့စ်မှာ အဖြေရှာဖို့ မကြိုးစားသေးပါဘူး။ မေးခွန်းပဲ ထုတ်ပါရစေဦး။
“နိုင်ငံကိုအုပ်ချုပ်ဖို့ အဆင်သင့်ဖြစ်ကြပါပြီလားခင်ဗျာ။”
Wednesday, February 11, 2009
Subscribe to:
Post Comments (Atom)
No comments:
Post a Comment